Ekinci Aqmescit “Hizb ut-Tahrir davası”nıñ iştirakçisi Tofik Abdulgaziyevniñ eşitüv qabiliyeti fenalaştı – advokat
Dekabrniñ 15-nde Rusiye idaresi astındaki Qırım Yuqarı mahkemesi Tofik Abdulgaziyevge qarşı uydurılğan "dava"nıñ materialları ile tanış oluv müddetiniñ qısqartılmasına dair advokatnıñ istinaf şikâyetni red etti.
Advokatı Emil Kurbedinovnıñ bildirgenine köre, Qırımdaki tahqiqat tevqifhanesinde tutulğan Abdulgaziyevniñ eşitüv qabiliyeti fenalaşqan.
“Bu mutlaq ayneciliktir. Ne men ne de menim müvekkilim öz aqqımıznı suistimal etmedik ve esnasnı sozmadıq. Materiallar FSB tarafından kerekli kibi azırlanmadı. Bunı imaye tarafı ve bizim müvekkilerimizge qarşı qullanmağa istediler, tez-tez yılnıñ soñunace davanı Rostov-na-Donudaki Cenübiy bölgeniñ arbiy mahkemesine bermek içün… Men istinaf şikâyetni berdim, bugün ise o baqıldı ve elbette qanaatlenidirilmedi”, – aytıp berdi Kurbedinov “Qırım birdemligi” cemaat birleşmesine.
Oña belli olğanına köre, dava materialları artıq Cenübiy bölgeniñ arbiy mahkemesindedir.
“Biz ballarnıñ Rostov-na-Donuğa etap etilmesini bekleymiz”, – dedi o.
Advokatnıñ bildirgenine köre, Tofik Abdulgaziyeaniñ sağlığı fenalaşqan – şu cümleden eşitüv qabiliyeti de.
“Endi yarmay eşite. Ne olğanını añlamay, amma eşitüv qabiliyeti fenalaştı. Bir qulağı azçıq eşite, ekincisi pek yaramay eşite”, – aytıp berdi advokat.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etkeninde qabaatlanğan 24 faal tutulğan edi. "Memorial" aq-uquq qoruyıcı merkezi olarnı siyasiy mabüsler olaraq tanıdı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ "Qırım birdemligi" faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.