Siyasiy mabüsler Mustafayev ve Siruk "Qırım inciri" ukrain-qırımtatar edebiyat yarışınıñ finalistler cedveline kirdi – teşkilâtçılar
Böylece, Server Mustafayev “Qırımtatar tilinde nesir”, Vadim Siruk ise “Qırım aqqında ukrain tilinde şiiriyet” namzetliginde finalğa çıqqanlar.
Haber etilgenine köre, ğalipler 2020 senesi dekabrniñ soñunda onlayn mukâfatlav merasiminde ilân etilecek.
2020 senesi "Qırım inciri" ukrain-qırımtatar edebiyat yarışında bıltır kibi 125 müellif iştirak etti. Olar em yazğan eserlerini, em tercimelerini yolladı. Umumen 284 iş keldi, dep bildire yarış teşkilâtçıları. Olarnıñ malümatına köre, 223 eser ukraince yazılğan, 25 eser qırımtatarca, 36 iş qırımtatarcadan ukraincege ve aksine tercime etildi.
Bıltır Aqmescitteki ekinci "Hizb ut-Tahrir davasınıñ" mabüsi Osman Arifmemetov ve Bağçasaraydaki ekinci "Hizb ut-Tahrir davasınıñ" mabüsi Server Mustafayev "Qırım inciri" ekinci edebiyat yarışı çerçivesinde "Söz serbestligi" nominatsiyasında mukâfat aldı.
Server Mustafayevdir – "Qırım birdemligi" cemaat birleşmesiniñ koordinatorı, vatandaş jurnalisti. Mustafayev uydurılğan dava boyunca terror teşkilâtınıñ faaliyetinde iştirak etkeninde ve akimiyetni küçnen zapt etmege tırışqanında qabaatlana. O, 20 yılğa qadar apis cezasına üküm etile bile.
Vadim Siruk - “terroristik teşkilâtnıñ faaliyetinde” iştirak etüvnen qabaatlanğan qırımtatar faali. 2019 senesi noyabr ayında Rusiye mahkemesi on 12 yıl apis cezasına mahküm etti.
Amnesty International Mustafayev ve Siruknı vicdan mabüsleri dep adlandardı.