Bir künde Qırımda yedi insan koronavirustan vefat etti – akimiyet
Keçken künü Qırımda 7 insan koronavirustan vefat etti, dep aytıla Qırımnıñ Rusiye sağlıq nazirliginiñ monitoring malümatında.
Müessise malümatına köre, umumen pandemiya vaqtında Qırımda 407 hasta vefat etti.
«Ambulator tedaviylevde (covid) 2858 kişi buluna, 2928 insan (covid ve pnevmoniya) hastahanede yata, 41 kişi observatorlarğa alındı. Umumen 20695 COVID-19 hastası qayd etildi. Tüzelgen 15920 insan hastahaneden çıqarıldı», – dep aytıla haberde.
Qırımda keçken künü 356 koronavirus hastası qayd etildi.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.