“Adamlarnı qurtarmaq kerek!”: Rusiyede rus apishanelerinde tutulğan qırımlılarnıñ destegine piketler olıp keçti (+foto, video)
“Arbatta qırımtatarlarnıñ destegine “Strategiya-18” nevbetteki aktsiyasını keçirdik. Plaktlarnı azırlmağa yetiştirmeymiz: er sefer yañı basqılar, yañı mabüsler. İstseñ çatla, isteseñ patla mabüslerni deñiştirmege istemeyler. Mabüsler koronavirusnen hastalar (sürekli hastalıqlardan ğayrı), olarğa ise yardım kösterilmey. Adamlarnı ölümden qurtarmaq kerek. Donetsk ve Lugansktaki FSB-niñ gizli apishaneleri aqqında malümat ep ziyade. Adamlarnı şu ceennemden qurtarmaq kerek. Çoqusıları 6 yıldan berli anda tutula. Ve episi bu XXI asırda, avropalı memlekette ola. Bu deşet özü toqtamaz, onı toqtatmaq kerek”, - dedi Lavreşina.
Onıñ sözlerine köre, birkişilik piketler kündüz ve aqşam olğan.
Aynı böyle aktsiya dekabrniñ 18-nde Leningrad vilâyetiniñ Şlisselburg şeerinde olıp keçken.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.Bugünki künde Rusiye taravfından siyasiy sebeplerden taqip etilgen Ukraina vatandaşlarınıñ sayısı 130 ola, dep bildirdi Ukraina Yuqarı Radasınıñ insan aqları vekâletlisiniñ kâtibiyeti Azatlıq Radiosınıñ muracaatına cevap berip.
2020 senesi oktâbrniñ soñuna qadar işğal etilgen Qırımda siyasiy ya da diniy sebeplerden başlatılğan cinaiy taqipler çerçivesinde eñ az 110 insan azatlıqtan marum etildi. Bu aqta Qırım aq qorçalayıcı gruppası haber ete.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.