Türkiye PACE çerçivesinde “Qırım platforması”nıñ meydanğa ketirilüvini destekledi – Ukraina millet vekili
Avropa Şurası Parlament Assambleyasında Ukraina daimiy temsilciliginiñ reisi Mariya Mezentsova ("Sluğa narodu" fraktsiyası), “Qırım platforması” PACE çerçivesinde çalışıp başlaycağına emin. Onıñ sözlerine köre, Türkiye Ukrainanıñ bu teşebbüsini endi qoltutqanlar. Bu aqta o, LB.ua-ğa intervyü bergende ayttı.
“Qırım platforması” esasında Assambleyada Qırımdaki insan aqları, siyasiy mabüsler, siyasiy, diniy ya da qavmiy ve diger sebeplerden taqipler meselelerini köterecekmiz”, – dedi millet vekili.
Mezentseva, PACE-niñ Qırımdaki vaziyet ile bağlı esabatı bu yıl taqdim etilecegine ümüt etkenini bildirdi.
"İslandiyadan Sunna hanım bu esasbat içün materiallar toplay. Bu vesiqa dünya yüzüni 2021 senesi körecek, dep ümüt etemiz. Amma bu daa tam degil, çünki işğal etilgen topraqlarğa kirüv sıñırlanğan. Bundan ğayrı, o, anda aytıp olamağanım şahsiy sebeplerden de ketip olamay", – dedi o.
Yanvar ayında Avropa Şurası Parlament assambleyasınıñ (PACE) Yuqarı Rada daimiy eyyetiniñ reisi Mariya Mezentseva («Sluğa narodu» fraktsiyası) PACE meydançığında resmiy olmaycaq «Qırım platforması» qurulacağını ilân etti.
Keçken sene, Türkiye Cumhuriyetiniñ Tış işler naziri Mevlüt Çavuşoğlu, Ankara Rusiye tarafından Qırımnıñ işğal etilmesini tanımamağa devam etkenini tasdıqladı ve Qırımnı işğalden azat etüv ukrain teşebbüsine destek bildirdi.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 21-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı "Qırım platforması" – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.