Aqmescitteki mahkeme «Edem Bekirov davası» boyunca diñlevlerni yañıdan başlattı – advokat
Cuma künü, fevralniñ 19-nda, Kreml kontrolindeki Aqmescitniñ Merkeziy rayon mahkemesi sabıq siyasiy mabüs, qırımtatar faali Edem Bekirovğa qarşı cinaiy davanı temelden baqıp başladı. Bu aqta advokat Aleksey Ladin bildirdi.
«2019 senesi sentâbr ayında «büyük deñişim» neticesinde o, (Edem Bekirov – QA) Ukrainağa ketti – qadı Aleksandr Demenok onıñ sıñırlav tedbirini (tamamen) lâğu etti, bundan evel ise apis cezası ev apsine bile deñiştirilmegen edi! Ve şimdi qadı Demenok Edem Bekirovğa qarşı cinaiy davanı ğıyabiy şekilde baqıp başlay. Bugün qabaatlav qararı seslendirildi. İmaye, bütün dava sahte, dep bildirdi», – dep yazdı Ladin Facebook saifesinde.
Onıñ aytqanına köre, bu dava boyunca nevbetteki mahkeme oturışuvınıñ keçirilüvi martnıñ 4-ne saat 10:00-ğa aynı Aqmescit mahkemesinde planlaştırıla.
Rusiye kontrolindeki Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
Mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.