Bir sıra Ukraina idareleriniñ temsilcileri Qırımnıñ işğalden azat etilüvi ile bağlı ortaq bilidrüv yaptılar
Qırımnıñ işğalden azat etilüvi ve reintegratsiyası ile oğraşqan idareler ve teşkilâtlarnıñ temsilcileri martnıñ 2-nde Herson vilâyet devlet memuriyetinde Qırım ve Aqyarnıñ işğalge qarşı tirenüv kününe bağışlanğan tögerek masa neticelerinden soñ ortaq bildirüv yaptılar. Bunı Ukrainanıñ vaqtınca işğal etilgen topraqlarnıñ reintegratsiyası meseleleri nazirliginiñ Herson bölgesindeki sektor müdiri Denis Çistikov seslendirdi.
Vesiqada Rusiye Federatsiyası tarafından tecavuz takbih etile, Herson vilâtiyeniñ sakinleri Qırım sakinlerine yardım etmege azır olğanları aqqında yazıla.
«Qırım sakinleriniñ meselelerine tam Hersonda hususan diqqat etilmesi müimdir. Aynı zamanda, yarımadanı işğalden azat etmek içün merkeziy seviyede de pek çoq iş yapıla. Misal olaraq, bir qaç kün evel prezident, işğalden azat etüv ve reintegratsiya içün yapılğan ayrı tedbirlerniñ ömürge keçirilmesini közde tutqan fermannı imzaladı. Bundan ğayrı, vesiqa Ukrainada «Qırım platforması»nıñ tesis sammitiniñ azırlavı ve keçirilüvi boyunca teşkiliy komitetniñ yaratılmasını közde tuta», – dedi Qırım MC Ukraina prezidentiniñ daimiy temsilcisi Anton Körineviç.
Bundan ğayrı o, Ukraina Milliy telükesizlik ve mudafaa şurası Qırımnıñ işğalden azat etilüvi ve reintegartsiyası strategiyasını azırlmaq kerek, dep qayd etti. Böylece Ukraina em Qıırm sakinlerine, em de dünya toplulığına yarımadanıñ azat etilüvi oğrunda ğayret etilgenini kösterecek.
Martnıñ 1-nde Ukraina Tış işler naziriniñ birinci muavini Emine Ceppar OSCE-de «Qırım platforması»nı taqdim etti ve aza memleketlerni avgustnıñ 23-nde keçirileck Qırım sammitinde iştirak etmege davet etti.
2021 senesi avgustnıñ 23-nde olacaq «Qırım platforması» sammitinde ABD prezidenti Joe Bidenniñ iştiragini beklemege büyük sebepler bar. Bunı fevralnıñ 27-nde, Qırım ve Aqyarnıñ işğalge qarşı tirenüv kününe bağışlanğan «Qırım evi»ndeki tedbirde qırımtatar halqı lideri Mustafa Cemilev ayttı.
Ukraina prezidenti Volodımır Zelenskıy, fevralnıñ 26-nda, cuma künü, Qırımnıñ işğalden azat etilüvi ve reintegratsiyası içün yapılğan tedbirler aqqında ferman imzaladı.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.