Rusiyedeki mahkeme Qırımdaki «Hizb ut-Tahrir davası» mabüsleriniñ apis cezasını uzattı – faaller
Rostov-na-Donu (Rusiye) Cenübiy okrugınıñ arbiy mahkemesi Aqmescitteki ekinci «Hizb ut-Tahrir davasınıñ» mabüsleri Remzi Bekirov, Riza İzetov, Farhod Bazarov, Raim Ayvazov ve Şaban Umerovnıñ apiste qaluv müddetini üç ayğa, 2021 senesi sentâbrniñ 16-na qadar uzattı. Bu aqta «Qırım birdemligi» cemaat birleşmesi Qırım.Aqiqatqa haber etti.
Qayd etilgenine köre, prokuror sebepler aynı qalğanı içün apiste qaluv müddetini uzatmağa rica etken, advokatlar ise azatlıqtan marum etüvnen bağlı olmağan sıñırlav tedbirini belgilemege rica etken edi.
«Prokuror uzatuv sebebini aytmadı. Daa evel seslendirilgen sebepler yoq. Dava malümatları toplandı, bir çoq şaat sorğuğa çekildi. Prokurornıñ muracaatta esaslanğan delillerini eşitmedim. Sebepsiz muracaatqa itiraz bildirmek pek qıyın», – dep ayttı birleşmege Edem Semedlâyev.
İmayeci Sergey Legostov ilk tahqiqatta olğan bütün telükeler yoq oldı, dep tüşüne. Onıñ fikirince, müvekkili Bazarovnıñ qaçmaq içün sebebi yoq, em de çoqusı endi sorğuğa çekilgen gizli şaatlarğa basqı yapmaq içün da sebepleri yoq. Deliller mahkemede, şunıñ içün olarnı yoq etmege endi imkân da yoq.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.