Aqmescitteki mahkeme oktâbrniñ 25-nde tutulğanlarğa aqlayıcı ükümler çıqardı
Moskva kontrolindeki Aqmescitniñ Merkeziy rayon mahkemesi Rusiye Memuriy uquq bozuvları kodeksiniñ 20.2.2 maddesiniñ 1-inci qısmına istinaden üç aqlayıcı üküm çıqardı – oktâbrniñ 25-nde tutulğan Yunus Bulatov, Enver Abselâmov ve Eskender Saliyevniñ davaları boyunca. Bu aqta Qırım.Aqiqat mühbiri bildire.
Bundan ğayrı, «Qırım birdemligi» cemaat birleşmesiniñ Qırım.Aqiqatqa bildirgenine köre, aqlayıcı üküm tutulğan daa bir kişi Mustafa Bekirovğa çıqarıldı.
Enver Abselâmovnıñ Qırım.Aqiqat mühbirine bergen tefsirinde tarif etkenine köre, tünevin onı Kefe şeerindeki vaqtınca tutuv izolâtorına ketirdiler.
«Aş ve suv bermediler. Şaraitler bayağı sert edi. Bugün, memuriy uquq bozuvım baqılğanda, mahkeme video baqıp, bir bozuv qayd etmedi. Şu sebepten memuriy davam qapatıldı», – dedi Abselâmov.
Aynı vaqıtta tünevin tutulğan Dilâver Memetov ve İsmail Vaapov mahkeme tarafından 10 ve 15 biñ ruble para cezasını aldı.
Bundan ğayrı, «Qırım birdemligi» cemaat birleşmesiniñ malümatına köre, Dlâver İbragimov, Amethan Umerov ve Ervin Emiraliyev 10 000 ruble, Erecep Memeşev 15 000 ruble para cezasını aldı.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
Aqmescitte Rusiye kontrolindeki Qırım garnizor arbiy mahkemesiniñ binası ögünde tutulğan qırımtatar faalleri, jurnalistler ve advokat yarımada regionlarınıñ farqlı vaqtınca tutuv izolâtorlarına ketirildi. Oktâbrniñ 26-nda mahkeme keçirilmesi planlaştırıla.
Qırımnıñ Rusiye quvet müessiseleri bu tutuvlarnı tefsir etmey.
«Krım SOS» cemaat teşkilâtı Aqmescitte qırımtatar faalleri tutulğanı sebebinden «Qırım platformasınıñ» işini faalleştirmege çağırdı.
Rusiye quvetçileriniñ oktâbrniñ 25-nde qırımtatar faallerine qarşı yapqan areketlerini takbih etken beyanat Ukraina prezidentiniñ Qırım Muhtar Cumhuriyetindeki Temsilciligi tarafından aydınlatıldı.