Qırımda Bağçasaraydaki «Hizb ut-Tahrir davasınıñ» ükmü ögüne dua keçirile
![Qırımda Bağçasaraydaki «Hizb ut-Tahrir davasınıñ» ükmü ögüne dua keçirile](https://gdb.rferl.org/00ab0000-0a00-0242-2353-08d9994f26ab_w800_h450.jpeg)
Qırım sakinleri Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetov içün dua keçire ve olarğa qoltutmaq içün fleşmob ötkere. Oktâbrniñ 29-nda saat 10:00-da olarnıñ ükümleri çıqarılacaq. Bu aqta «Qırım birdemligi» cemaat birleşmesi haber ete.
Faallerniñ malümatına köre, Qırımnıñ farqlı köşelerinden insanlar «Qırım birdemligine» Bağçasaraydaki üçünci «Hizb ut-Tahrir davasınıñ» siyasiy mabüslerine qoltutuv fotoresimlerini yollay ve olarnı içtimaiy ağlarda saifelerinde derc ete.
«Siyasiy mabüslerniñ yaqınları ve yarımadanıñ lâqayt qalmağan sakinleri yapılğan qanunsızlıq ve müminleri içün talap etilgen apis cezalarınen razı olmağanını köstere», – dep aytıla haberde.
Bundan ğayrı, Qırımnıñ meskün yerlerinde insanlar Bağçasaraydaki «Hizb ut-Tahrir davası» mabüslerine qoltutmaq içün dua keçire.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.