«Biz onıñ ayatı içün qorqamız»: Kefede tintüvden soñ tutulğan qırımtatarnıñ tuvğanları onı tapıp olamaylar
Rusiye quvetçileriniñ Primorskiy qasabasında saba tintüvinden soñ tutulğan Kurtumer Çalgozovnıñ yaqınları onı alâ daa tapıp olamaylar. Bunı Qırım.Aqiqatqa Kurtumerniñ anası Selime bildirdi.
«Qayda olğanını bilmeyim. Onı saba saat 8-de alıp kettiler ve o alâ daa evde degil. Ne yerde ve onen ne olğanını bilmeymiz», – dedi Selim.
Tuvğanlarınıñ bildirgenine köre, quvetçiler onı sorğulay ekenler, amma ne yerde olğanını aytmaylar.
«Bunıñ içün onıñ ayatı ve sağlığı içün qorqamız, FSB hadimlerine ve digerlerine telefon etemiz, amma FSB-de ne yerde olğanını bilmeyler. Tahqiqat komiteti de bilmey, şunıñ içün pek qorqamız. Yani insanğa iç bir qabaat ilân etilmedi. İç bir madde yoq. Onı sanki şaat kibi alıp kettiler, şunıñ içün böyle gizli bir şeyler olmamalı. Ve bizge ne yerde olğayenını bildirmeliler. Bizge polis hadimi keldi. Biz insan ğayıp olğanı aqqında ariza yazdıq», – dedi o.
Dekabrniñ 14-nde Primorskiy qasabasında (Kefe) Rusiye quvetçileri 23 yaşındaki qırımtatar Kurtumer Çalgozovnı tuttılar. Tutulğannıñ anası Selime Çalgozovanıñ birleşmege aytıp bergenine köre, tintüv saba saat 5:15 başlanğan ve 3 saat devam etken. Kurtumerniñ telefonını tutıp alğanlar. Tintüvden soñ soyları munasip protokolnı imzalağanlar. Qayd etilgeni kibi, tintüv vaqtında evde Çalgozovlarnıñ bütün aile azaları buluna edi - baba, ana, Kurtumer ve onıñ eki qız qardaşı, birisi 7 yaşında eken.
Şimdiki vaqıtta ne sebepten Çalgozov tutulğanı belli degil. Soyları qayda onı alıp ketkenlerini bilmeyler.
Soylarnıñ bildirgenine köre, Kurtumer furunhanede çalışa, ciu-citsu ile oğraşa, kimerde yarışlarda iştirak ete.