"Gaz borusında diversiya" davası: mudafaa tarafı qabaatlanğanlarnıñ iskencelerge oğratılması aqqında iddialarını tekrarladı
Qırımda "gaz borusındaki diversiya davası" boyunca apiske alınğan Nariman Celâl ve ağa-qardaş Ahtemovlarnıñ mudafaası qabaatlanğanlarnıñ iskencelerge oğratılması aqqında iddialarını tekrarladı. Bunı Facebookta advokat Nikolay Polozov haber etti.
"Bugünki oturış vaqtında mudafaa tarafı bazı azırlanğan muracaatlarnı berdi, olarnıñ muzakeresi zamanı iskence, ğayrı insaniy ve qanunsız davranuv ile bağlı sual peyda oldı, o, FSB hadimleriniñ olarğa qarşı etkenleri, nasıl etip şaatlıq ettirgenleri aqqında mahkemege tafsilâtlı malümat berdi", - dep yazdı Polozov.
Qırımdaki mahkeme muracaatnı qanaatlendirmekten red etken.
Polozovnıñ bildirgenine köre, bazarertesinece teneffüs ilân etilgen.
"Nariman, Asan ve Aziz mahkemede iştirak ettiler. Episi pozitivdir, küreşmege ve öz qabaatsızlığını isbatlamağa azırlar. Olar, olarnı desteklegen er keske minnetdarlıq ve selâmlar bildireler", - dep yazdı advokat.
Rusiyeniñ nezaretinde olğan Qırımnıñ Yuqarı mahkemesi fevralniñ 18-nde Qırımtatar siyasetçisi ve faali Nariman Celâl ve faaller Aziz ve Asan Ahtemovlarmabüsleri olğan Anğara köyündeki "gaz borusında diversiya" davası boyunca ilk diñlevlerni başladı.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Qırımtatar siyasetçisi ve faali Nariman Celâl işğal altındaki Qırımda tahqiqat ve adliyeni «yalancı» ve «sımarlanğan» dep adlandırdı.
Yanvarniñ 25-nde Rusiye kontrolindeki Qırım Yuqarı mahkemesi Nariman Celâl, Asan ve Aziz Ahtemovlarnıñ apiske alınmasına qarşı imayeniñ istinaf şikâyetini red etti. Olar eñ az fevralniñ 23-ne qadar SİZOda qalacaq.
Advokat Nikolay Polozov Nariman Celâl «tış dünyadan ciddiy bir izolâtsiyada» tutula, dep qayd etken edi.