Qırımtatar resurs merkezi işğal etilgen Qırımdaki vaziyet aqqında yañı informatsion kampaniyanı taqdim etti
Çarşenbe künü, fevralniñ 23-nde, Qırımtatar resurs merkezi maqsadı Ukraina ealisini işğal altındaki Qırım vaziyetinden haberdar etmek olğan yañı #LIBERATECRIMEA informatsion kampaniyasını taqdim etti.
Bu kampaniya Qırım işğaline qarşı tirenüv kününe bağışlana ve nevbetteki adımlarnen yerine ketirilecek:
Ealiniñ farqlı gruppalarına Qırım işğaline qarşı tirenüv künü aqqında haberdar olğanınen bağlı test yaptıruv;
Qırım işğaline qarşı tirenüv künü munasebetinen televideniye ve içtimaiy ağlarda qullanılacaq heştegni azırlav;
Facebook içün mevzulı çerçive yapuv;
Qırım işğaline qarşı tirenüv künü munasebetinen infografikanı azırlav;
Ukraina şeerlerinde «bordo» kampaniyalarnı keçirüv;
Malümatnı tarqatuv maqsadınen Facebook, Telegram, Twitter kampaniyalarını keçirüv.
«Bu kampaniya Qırımnen bağlı böyle tarihiy künlerge bağışlana: fevralniñ 26-sı – Qırım işğaline qarşı tirenüv künü; mayısnıñ 18-i – Qırımtatar halqı genotsidiniñ qurbanlarını añma künü; iyünniñ 26-sı – Qırımtatar milliy bayrağı künü; avgustnıñ 9-ı – Dünyanıñ tamır halqlar künü», – dep bildirdi Qırımtatar resurs merkeziniñ yolbaşçısı Eskender Bariyev kampaniyanı taqdim etkende.
Berilgen malümatqa köre, Lvivde fevralniñ 22-nden 24-ne qadar keçecek «Qırım künleri» başlandı.
Hatırlatamız, Ukraina prezidenti Volodımır Zelenskıy 2020 senesi çıqarğan buyruğınen fevralniñ 26-sını Qırımnıñ Rusiye tarafından işğal etilüvine qarşı tirenüv künü dep belgiledi.