Zelenskıy Qırım köpründeki patlav aqqında: «Bunı kesen-kes sımarlamadıq»
Ukrayına prezidenti Volodımır Zelenskıy Keriç (Qırım) köpründeki patlavnı Ukrayına mahsus hızmetleri tura kibi tahminlerini red etti. Bu aqta Zelenskıy CTV News Kanada telekanalına bildirdi.
«Bunı (Keriç köpründeki patlav – QA) kesen-kes sımarlamadıq, bilgenime köre. Olarnıñ (Rusiyeniñ – QA) arbiy ve mahsus hızmetleri, istihbarat arasında ciddiy munasebetleri bar. Anda akimiyet vertikalleri bar. Bu büyük sistema. Eski Birlikte bu KGB edi. Bugün o, aralarındaki kim baş olğanını qarar bergen bir qaç pıtaqlardan ibaret», – dep bildirdi Zelenskıy.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı.
Rusiye prezidenti Vladimir Putin bu patlavnı "terakt" dep adlandırdı, onıñ icracıları ve sımarış etkenler Ukrayina mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına Baş istihbarat idaresiniñ spikeri Andrey Yusov Rusiyeniñ Keriç köpründe patlav tahqiqatını «saçmalıq» dep adlandırdı.
Ukrayına resmiy şahısları izaat bermey. Prezident ofisiniñ yolbaşçısı Mıhaylo Podolâk «Putinniñ şahsiy leyhasını» patlatuv – rusiyelilerniñ işi ve arbiy reberlikniñ FSBge qarşı ücümi ola, dep ayttı.
Bulğaristan ve Gürcistan Keriç köpründe patlatılğan yük olarnıñ sıñırlarından keçti degen Rusiye tahqiqatınıñ malümatını red etti. Ermenistan «Keriç köpründe terakt kerçekleştirüvde aracılıq» aqqında cinaiy dava açtı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.