Hersondaki memuriyet binasından Rusiye bayrağı alındı
İşğal etilgen Hersonda Herson vilâyetiniñ memuriyet binasından Rusiye bayrağı alındı. Foto ve videolar yerli saifelerde derc etildi, olarnı Rusiye kütleviy haber vastaları derc ete.
«Komsomolskaya pravda» mühbiri Aleksandr Kots bayraq yoq dep tasdıqladı. Onıñ aytqanına köre, şeerde diger binalarda Rusiye bayraqları qala.
Rusiye akimiyeti bayraq çıqarılğanını şimdilik izaatlamadı. Faqat Herson vilâyeti Rusiye memuriyetiniñ yolbaşçı muavini Kirill Stremousov «Solovyev TV» telekanalınıñ yayınında Rusiye ordusı Dnipronıñ sol tarafına çekile bile, dep tahmin etti. Bu Herson şeeriniñ teslim etilmesi demek olacaq.
Stremousovnıñ aytqanına köre, eñ yaqın eki aftada Ukrayına ordusı şeerge ücüm ete bile.
Ukrayınada Rusiye gruppirovkasınıñ komandanı general Sergey Surovikin martnıñ başında Rusiye ordusı işğal etken vilâyet merkeziniñ keleceginen bağlı «zor qararlar» ola bile, dep ayttı.
Herson vilâyetiniñ işğalci akimiyeti Dniprodan vatandaş naqliyat vastalarınıñ areketi toqtatıldı, dep ilân etti. Bu qarar Dnipronıñ sağ qısmından «tahliye» yekünlenmesinen ve «arbiy telükesizlik» ve «barışıqsever ealige qarşı telükelerniñ artmasınen» añlatıla.
Herson vilâyeti arbiy memuriyetiniñ yolbaşçısı Yaroslav Yanuşeviç Herson sakinlerini Rusiye işğalcileriniñ «şeerni terk etmek ve Dnipronıñ sol yalısına keçmek» talaplarına qulaq asmamağa çağırdı. Ukrayına akimiyeti Rusiye areketlerini «mecburiy sürgünlik» dep adlandıra.
Kyivniñ soñki malümatına köre, Herson vilâyetinde 88 mesken yer işğalden azat etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.