Rusiyeniñ Dniproğa qarşı darbesi 6 balanı öldürdi, elâk olğanlarnıñ sayısı – 45
Dniproda çoq qatlı evge tüşken Rusiye raketasınıñ darbesi neticesinde elâk olğanlarnıñ sayısı 45 oldı, dep bildirdi vilâyetniñ arbiy memuriyet yolbaşçısı Valentın Rezniçenko.
«Rusiyeliler alğan canlarnıñ hatırasına qurtarıcı, polis, göñülli ve Dnipro başınen beraber viran olğan evge çeçek ketirgenler. Berilgen malümatqa köre, Rusiye raketası 45 insannı öldürdi, 6-sı bala», – dep yazdı o, Telegram kanalında.
Raketa darbesinden üç künden soñ – yanvarniñ 17-nde – qıdıruv-qurtaruv işleri yekünlendi.
Yanvarniñ 17-nde saba viraneler tübünden elâk olğan dördünci balanıñ cesedi çıqarıldı. Haber etilgenine köre, umumen 79 insan yaralandı, 16-sı bala.
Yanvarniñ 14-nde Rusiye ordusı Ukrayınağa qarşı daa bir kütleviy raketa darbesini endirdi. Neticede Dniproda doquz qatlı evniñ bir qısmı viran etildi. Viraneler bir qaç kün devamında baqıldı.
Qırımda ise Rusiye ordusını Dniprodaki mesken evge darbe endirgeni içün içtimaiy ağlarda qabaatlağanlarnı taqip etip başladılar.
Ukrayına arbiyleriniñ malümatına köre, Rusiye Dniprodaki doquz qatlı evge X-22 aviatsiya qanatlı raketasınen darbe endirdi. O, Rusiyeniñ Kursk vilâyetinden Tu-22 bombardıman uçağından atıldı. Ukrayına Silâlı quvteleriniñ Ava quvetleri komandanı general-leytenant Mıkola Oleşçuk mahsus beyanatında Ukrayınanıñ «böyle raketalarnı tüşürecek ateş vastaları yoq», dep bildirdi.
Kreml Rusiye ordusınıñ Dniprodaki çoq qatlı evge qarşı yapılğan raketa darbesinen alâqası yoq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.