Новости за 20.12.2024

Казанда «Татар әниләренең беренче форумы» узды. Анда катнашкан дин белгече Рамил хәзрәт Юныс бәхетле гаилә нигезләре, балаларга дөрес тәрбия бирү турындагы фикерләре белән уртаклашты.

Казанның «Елмай» паркында 3 гыйнвардан 7 гыйнварга кадәр «Яңа елдан башлыйм» балалар лабораториясе оештырыла. Проектка 12 яшьтән 16 яшькә кадәрге балалар кушыла ала, дип хәбәр итте балалар иҗтимагый киңлеге командасы.

19 декабрьдә Казан шәһәренең «Наташа» хосписында рәсми рәвештә намаз уку бүлмәсе ачылышы тантанасы узды. Әлеге чарада Анжела Вавилова исемендәге иҗтимагый хәйрия фонды идарәсе рәисе, «Наташа» хосписының генераль директоры Владимир Вавилов, Татарстан мөфтиятенең «Зәкят» хәйрия фонды генераль директоры Булат Мәрданов һәм башкалар катнашты. Бу хакта ТР Диния нәзарәте матбугат хезмәте хәбәр итә.

Җомга көнне, 20 декабрьдә, Татарстанда иртән явым-төшем көтелми, әмма урыны белән томан булуы ихтимал. Ә менә көндез һәм кичен республиканың кайбер районнарында бераз кар явачак, хәтта буран да булачак.

Бүген Мөслимдә «Яшьлек» спорт комплексында үзенчәлекле күргәзмә эшли башлады. «Яшьләр сайлый!» дип исемләнгән әлеге күргәзмәне «Август-Агро» идарәче компаниясе оештырган. Бу хакта «Мөслим-информ»да Фәридә Гайнетдинова яза.

Лаеш районы Советында махсус хәрби операциядә һәлак булган Алексей Сосипаторовның туганнарына дәүләт бүләге тапшыру тантанасы булды. Бу хакта «Кама ягы» сайтында хәбәр ителә.

Чирмешән районында авыррак тормышта яшәүче балаларның Яңа ел теләкләре бик тиздән чынга ашарга тиеш. Район җитәкчеләре «Теләкләр чыршысы» акөиясенә кушылды. Бу хакта «Безнең Чирмешән» сайтында Марат Гомәров яза.

Әгерҗе районы Иске Эсләк авылында яшәүчеләр махсус хәрби операциядәге якташларына үлән чәйләре ясыйлар, маскировкалау челтәрләр үрәләр. Шулай ук авыл халкыннан җыелган акчага хәрбиләр өчен кирәкле әйберләр алу оештырылды. Бу хакта «Әгерҗе хәбәрләре» сайтында Индира Галләмова яза.

Әлмәт муниципаль районы «Инвестицион эшчәнлек буенча Татарстан Республикасының иң яхшы муниципаль берәмлеге» конкурсында җиңү яулады. Бу хакта «Әлмәт таңнары» район хакимиятенә сылтама белән хәбәр итә.