Казанда яшь галимнәргә Завойский исемендәге премияләрне тапшырдылар

(Казан, 29 сентябрь, «Татар-информ»). 28 сентябрьдә Казан федераль университетында физика өлкәсендә яшь галимнәр арасында Е. К. Завойский исемендәге премия тапшыру тантанасы узды. Быел премияне Казан федераль университетыннан техник фәннәр кандидаты Артем Александровка «Атом-төш-магнит каротажы приборларын эшләү һәм гамәлгә кертү» проекты өчен тапшырдылар. Бу турыда Казан мэриясенең матбугат хезмәте хәбәр итте. Казан федераль университетының физика-математика фәннәре кандидаты Дарья Мельникова «Альфа һәм к-казеиннар мисалында эчке тәртипсез структуралы аксымнарның трансляцион хәрәкәтчәнлеге үзенчәлекләре» проекты өчен һәм Е. К. Завойский исемендәге Казан физика-техника институтының физика-математика фәннәре кандидаты Джавид Мамедов «Мультифроикларның нечкә пленкаларының магнит үзлекләре» проекты өчен II дәрәҗә диплом белән бүләкләнде. Шулай ук финалистлар арасында КНИТУ-КАИдан Василина Фельцингер һәм Анжелика Калеева, Казан федераль университетыннан Дмитрий Иванов бар иде.

Завойский исемендәге премия ел саен күренекле физикның туган көнендә бирелә. Быел 35 яшькә кадәрге галимнәрдән барлыгы 8 гариза тапшырылган. Премиядә катнашучыларның эш темалары актуаль, фәнни әһәмиятле, ә тикшеренү методлары һәм алымнары — яңа булырга тиеш. Моннан тыш, экспертлар конкрет нәтиҗәләрнең булуын, шулай ук эш нәтиҗәләрен практикада куллану мөмкинлеген бәяләделәр. Шулай итеп, конкурс ярдәмендә сайлап алу нәтиҗәләре буенча финалга яшь галимнәрнең иң яхшы 6 эше узды.