Чирмешән районы эчке эшләр бүлеге музеенда 75 еллык милиция формасы саклана
Чирмешән районы полиция бүлеге музеенда Бөек Ватан сугышыннан соң милиция хезмәткәрләре кигән форма да саклана. Ул иң дәрәҗәле экспонатларның берсе. Әлеге форманы милиция шоферы, Бөек Ватан сугыш ветераны Семен Плотников киеп йөргән.
Чирмешән район эчке эшләр бүлегенең тарих һәм сугышчан дан музее 2005 елда Бөек Җиңүнең 60 еллыгы уңаеннан оештырыла. Татарстан Эчке эшләр министрлыгы әлеге юбилей уңаеннан дан почмагы оештырырга тәкъдим итә. Ул вакытта бүлекне җитәкләгән Фаяс Минһаҗев почмак кына түгел, ә музей булдыру турында карар кыла. Бу хакта «Безнең Чирмешән» сайтында хәбәр ителә.
«Музейны ачкан вакытта йөздән күбрәк экспонат бар иде, без аларны икенче каттагы бер бүлмәдә урнаштырдык. Һәр елны 9-10 экспонатка байый иде. Алар һәрберсе музей паспортына теркәлә, анда экспонатларның тарихы һәм тапшыручысы – иясе турында да мәгълүматлар языла», – диде музей оештыру эшен башлап йөрүчеләрнең берсе Марина Яковлева.
Район эчке эшләр бүлекләре музейлары арасында оештырылган республикакүләм бәйгедә әлеге музей Гран-при яулаган булган, шуның өчен аларга компьютер бүләк иткәнәр.
18 ел элек оешкан музейда инде меңләп экспонат исәпләнә, күпчелеге – фотолар, төрле документлар алып тора. Шунда ук эчке эшләр хезмәткәрләре төрле елларда кигән формалар, аяк киемнәре, кораллар, җиһазлар да бар. Ун елда тупланган экспонатлар бу бүлмәгә генә сыймый башлагач, 2016 елда аларны подвалдагы укыту кабинетына күчерергә туры килә.
«Әле күптән түгел генә музеебыз тагын бер кызыклы экспонатка баеды, ветеран хезмәттәшебез Исмәгыйль Кәримов үзе киеп йөргән фетр итекләр китерде, бу итекләр - эчке эшләр хезмәткәрләренең җылы аяк киемнәре, - диде район полиция бүлегенең ветераннар советы рәисе Наилә Мәссарова.
13 ел элек куркыныч җинаятьчене тоткарлаганда һәлак булган милиция майоры Мирсәет Кәбиров истәлегенә аерым бер почмак эшләнгән. Биредә аның документлары, кайберләренең күчермәләре, фотолары урын алган. Ә пуля тишкәләгән документлары ТР ЮХИДИ бүлеге музеенда саклана.