Әтнәдә Шиһабетдин Мәрҗанинең 205 еллыгына багышланган очрашу булды
Татар мәгърифәтчелек хәрәкәтенең күренекле вәкиле, галим, фикер иясе, атаклы педагог һәм дин әһеле Шиһабетдин Мәрҗанинең 205 еллыгы уңаеннан, Әтнәдә аның музеенда «Мөселман хатын-кызларның гаиләдә һәм җәмгыятьтә әһәмияте» дигән темага очрашу кичәсе үтте. Анда районның актив мөселман хатын-кызлары катнашты. Бу хакта «Әтнә таңы» сайтында хәбәр ителә.
«Милләтебезнең даһи кешеләре хатын-кызларга олы хөрмәт күрсәткән. Шулар исәбендә Шиһабетдин Мәрҗани дә. Ул татарның алдынгы фикерле зыялысы буларак хатын-кызларның тормыштагы хокуксызлыгы, мәгариф өлкәсендәге артталыгы белән килешергә теләми. Мәрҗани Коръәнне тирәнтен өйрәнеп, хәдисләрне анализлап, борынгы ислам мәдәниятенең бай традицияләренә таянып дини фанатизмга каршы чыккан зыялы.
Яшь буынның киләчәге хакында кайгыртып, Мәрҗани: «Гыйлем һәм мәгърифәт белән шөгыльләнү, акыл белемен һәм камиллекне өйрәнү – һәр сәламәт акыл, аек аң каршында, һичшиксез, кирәкле сыйфат, ә бу өлкәдә тырышлык һәм бербереңә киң ярдәм күрсәтү – берсүзсез күркәм эш», – дип билгеләгән. Аның бу фикере ул заманда «кыз балаларга гыйлем өйрәтү – хәрам», дип әйтүчеләргә җавап булып яңгырый.
Шиһабетдин Мәрҗанигә 4 яшь булганда әнисе Бибихәбибә вафат булгач, хатын-кызларга, бигрәк тә аналарга, сакчыл караш кирәклеген бик яхшы аңлаган. Бервакыт кызлары белән бер түрәгә кунакка барып кайтканнан соң кызларына карап «Менә аларның кызлары өчдүрт тел белүләре өстенә, музыка да өйрәнә. Сез дә дөм сукыр, дөм гафил булмагыз. Иң азында ике төрле язу өйрәнегез», – дигән. Ул кызларын укымышлы итәргә тырышкан», диелгән хәбәрдә.
Музей җитәкчесе Зилә Зиннәтуллина җиткергән әлеге мәгълүматларны кичәгә килгән кызлар, хатын-кызлар да йотлыгып тыңлады.