Казанда яңа Җәмигъ мәчете янында мөселман мәктәбе төзеләчәк

Казанда яңа Җәмигъ мәчете янында мөселман мәктәбе төзеләчәк. Ул булачак ислам зыялыларын әзерләячәк. Бу хакта «Миллиард.Татар» хәбәрчесенә Татарстан мөселманнары Диния нәзарәте рәисе урынбасары Рәфыйк Мөхәммәтшин әйткән.

«Бу максат өчен яңа Җәмигъ мәчете янында җир кишәрлеге бүлеп бирелгән. Заманча мәктәп булсын өчен чит илдә тәҗрибәсе булган яхшы менеджерны ялладык. Аны 2023 елда төзи башларга җыеналар», - дип хәбәр итте Мөхәммәтшин.

«Сүз [мәктәптә] Россия ислам институты өчен абитуриентлар әзерләү турында бармый. Аны тәмамлаучылар Югары икътисад мәктәбенә һәм Мәскәү дәүләт университетына керә алачак. Яңа уку йортының төп максаты - ислам дине һәм җитди белем дәрәҗәсе булачак ислам зыялыларын әзерләү», - дип уртаклашты ТР мөселманнары Диния нәзарәте рәисе урынбасары.

Аның сүзләренчә, Казанда яңа Ислам гомумбелем бирү мәктәбе проектына ихтыяҗ зур, чөнки мондый профильле оешмалар җитми. Хәзер шәһәрдә бер генә Ислам мәктәбе - «Усмания» эшли.

Искәртик, «Миллард.Татар» түгәрәк өстәле кысаларында Рәфыйк Мөхәммәтшин 1200 балага исәпләнгән мөселман мәктәбе төзелеше турында әйткән иде.

Яңа Җәмигъ мәчете Казанда элеккеге «Кырлай» күңел ачу паркы территориясендә төзеләчәк. Ул берьюлы 10 мең кешене кабул итә ала. 2022 елның 20 маенда гыйбадәт йорты нигезенә беренче таш салынды. Тантанада Татарстан Президенты Рөстәм Миңнеханов, республика мөфтие Камил хәзрәт Сәмигуллин, РФ мөселманнары Диния нәзарәте һәм Россия Мөфтиләр шурасы башлыгы Равил Гайнетдин, мөселманнарның Үзәк Диния нәзарәте рәисе Тәлгать Таҗетдин һәм башка мөхтәрәм кунаклар катнашты.