Түбән Камада «татар» батальонының 19 солдатын искә алдылар

Бүген Түбән Кама шәһәре зиратындагы Мактаулы гражданнарның үзәк аллеясында митинг узды. Анда "татар" батальонының 19 сугышчысын искә алдылар. Бу хакта Түбән Кама муниципаль районының рәсми сайтында хәбәр ителә.

Чарада РФ Дәүләт Думасы депутаты Айдар Метшин, ТР хәрби комиссары, генерал-майор Сергей Погодин, Түбән Кама муниципаль районы башлыгы Рамил Муллин, шәһәр һәм район Советы депутатлары, идарә җитәкчеләре, һәлак булган сугышчыларның туганнары, Түбән Кама муниципаль районының Ветераннар советы, предприятиеләр, иҗтимагый оешмалар вәкилләре, эзләү отрядлары әгъзалары, волонтерлар һәм Түбән Каманың битараф булмаган кешеләре катнашты.

«Бу көн безнең өчен ныклы элемтә, батырлык һәм патриотлык традицияләренең дәвамчанлыгы символы. Бу сугышчылар Ватанны саклап һәлак булды. Шунысы куанычлы патриотизм, Ватанга мәхәббәт бүген дә дәвам итә. Бу махсус хәрби операция зонасында үз бурычларын үтәгән ир-егетләрнең үрнәгендә ачык күренә. Без әтиләребезнең һәм бабаларыбызның батырлыгын истә тотарга тиеш», – диде Рамил Муллин.

80нче чаңгы батальонының 19 солдаты арасында Айдар Метшинның бабасы да булган.

«Без Бөек Ватан сугышы елларында Ватаныбызның тынычлыгын һәм иреген яклаган, бүген илебез мәнфәгатьләрен яклап батырлык күрсәткән һәм махсус хәрби операция зонасында булганнарны да белергә һәм истә тотарга кирәк. Без һәлак булган сугышчыларның, хәзерге ветераннарның һәм бүген безнең белән янәшә булганнарның бурычын үтәдек. Без сезнең алда башыбызны иябез. Сугыш кырларында калган геройларга мәңгелек дан», – диде ул.

Өч ел элек «татар» чаңгы батальоны сугышчыларын җирләү тантанасында катнаштык. Түбәнкамалылар мондый һәйкәл булуы белән горурлана. Түбән Кама һәрвакыт патриотлык белән аерылып торды һәм бүген бу традицияләр дәвам итә», – дип билгеләп үтте үз чыгышында Сергей Погодин.

«Бүген якташларыбызның һәлак булуына 81 ел тулды. Алар безнең хәтеребездә мәңге яшь булып калды. Өлкән буын яшьләргә әлеге батырлыклар турында истәлекләрне җиткерү өчен барысын да эшләячәк», – диде Түбән Кама муниципаль районы Ветераннар советы рәисе Григорий Китанов.

Митинг бер минутлык тынлык белән тәмамланды. 19 солдат исемнәре белән искә алынды, аннары барлык катнашучылар якташ-геройлар истәлегенә чәчәкләр салды.