Татарстан 50 процент йөк машинасы шиналары һәм полиэтиленның өчтән бер өлешен җитештерә
Татарстан һәрвакыт үзенең казанышлары, инновацияләре һәм химия һәм нефть химиясе өлкәсендәге перспективалы проектлары белән дан тотты, дип белдерде Түбән Камада Химиклар көнен бәйрәм итүдә ТР Рәисе Рөстәм Миңнеханов. Бу хакта ТР җитәкчесенен матбугат хезмәте хәбәр итә.
Чара шәһәрнең нефть химиклары паркында узды һәм химия һәм нефть химиясе сәнәгате предприятиеләре хезмәткәрләрен, җирле югары уку йортлары һәм фәнни-тикшеренү институты укытучылары һәм хезмәткәрләрен, тармак ветераннарын җыйды
Рөстәм Миңнеханов билгеләп үткәнчә, Татарстанга полиэтиленның өчтән бер өлеше, синтетик каучукларның 40 проценттан артыгы, Россия буенча җитештерелгән йөк машинасы шиналарының яртысыннан артыгы туры килә.
«Химикларыбыз һәм нефть химикларыбыз тырышлыгы белән без һичшиксез илнең фәнни-технологик комплексын үстерүгә этәргеч булачак яңа проектларны һәм ачышларны гамәлгә ашыру алдында торабыз», — дип ышана Татарстан Рәисе.
Ул хезмәттәшлек өчен Себер-Урал нефть-газ химиясе компаниясенә (СИБУР) рәхмәт белдерде, Менделеевскиның «Аммоний» ашламалар җитештерүче заводын билгеләп үтте һәм тармак ветераннарына аерым мөрәҗәгать итте.
«Беләм, сезнең күбегез бүген дә җитештерүдә эшли, бай белемнәрен һәм тәҗрибәсен яшь буынга тапшыра. Сезнең алда баш иябез. Озын гомер һәм иминлек сезгә», - диде Миңнеханов.
Бүгенге дөньяда, һичшиксез, безнең яшәү рәвешен үзгәртәчәк технологияләр барлыкка киләчәк, шуңа күрә Миңнеханов яшь химикларны даими белем алу һәм үсешкә чакырды. Чын белгеч фәнни белемнәрне үстерергә һәм аларны практикада кулланырга әзер булырга тиеш. Аның профессиональлегенә үзенең киләчәге генә түгел, ә туган төбәгенең һәм бөтен илнең киләчәге бәйле.
Чара дәүләт бүләкләре тапшыру белән тәмамланды.
Тантанада шулай ук идарә рәисе, СИБУР генераль директоры Михаил Карисалов, Түбән Кама районы башлыгы Рамил Муллин катнашты.