Уфада «Китап бәйрәме»ндә өч көндә 174 мең кеше булган
Башкортстанның Уфа шәһәрендә 24-26 май көннәрендә узган «Китап бәйрәме» II Халыкара китап ярминкәсенә нәтиҗә ясалды. Оештыручылар мәгълүматы буенча, Китап бәйрәменең өч көнендә 173632 кеше булган, узган ел белән чагыштырганда, 11 мең кешегә күбрәк. Беренче көнне, 24 майда, ярминкәдә 48471 кеше килгән, 25 майда анда 78532 кеше, 26 майда 46629 кеше булган. Бу хакта «Башинформ» хәбәр итә.
«Китап бәйрәме» чараларында барлыгы 233 нәшрият һәм китап сату оешмасы катнашты. Анда Россиянең 18 төбәге һәм 7 чит ил (Беларусь, Азәрбайҗан, Үзбәкстан, Таҗикстан, Казахстан, Кыргызстан, Согуд Гарәбстаны) вәкилләре катнашты.
Бәйрәмгә килүчеләр барлыгы 8,8 млн сумлык 73 меңнән артык китап сатып алган. «Китап» нәшрияты гына да 2300 китапны яңа хуҗалы иткән. Моннан тыш, һөнәрче-осталар 954 мең сумлык, гастро-зонада катнашучылар 2 млн сумнан артык суммада продукция саткан.
Күргәзмәдә катнашучылар шулай ук 130 дан артык мастер-класслар уздырган, язучылар белән 50дән артык очрашу оештырылган, махсус хәрби операциядә катнашучыларга теләкләр һәм җылы сүзләр белән 737 хат әзерләнгән һәм юлланган, «Китап бәйрәме» почтасы белән Россия буйлап 960 открытка җибәрелгән.
«Әдәби прививка» хәйрия акциясендә 3 меңнән артык кеше катнашты, 800 дән артык китап балалар йортлары өчен бүләккә алынды, гаилә мөнәсәбәтләрен ныгыту өчен 300дән артык психологик уен үткәрелде, диелгән хәбәрдә.