Фәрит Мөхәммәтшин «Мөмкинлекләр» яшьләр форумында катнашучылар белән очрашты
Бүген Татарстан Дәүләт Советы Рәисе Фәрит Мөхәммәтшин «Мөмкинлекләр» яшьләр форумы катнашучылары һәм аны уздырган «Татарстан – Яңа гасыр» иҗтимагый хәрәкәте активистлары белән очрашты. Форум өч көн Болгар шәһәрендә узды, дип хәбәр итә Дәүләт Советының матбугат хезмәте.
Фәрит Мөхәммәтшин хәрәкәт коллективын 25 еллыгы белән котлады (оешма чирек гасырлык юбилеен 3 июльдә билгеләде).
«25 ел – бер яктан караганда, оешманың статусын билгели торган вакыйга, икенче яктан – алга таба да эшләү өчен этәргечне арттыра. Безнең хәрәкәт республикадагы барлык зур вакыйгаларда катнаша, әмма иң мөһиме – яшьләргә терәк булу, аларга аякка басарга, һөнәр сайларга ярдәм итү, аларны республиканың сәяси тормышында актив катнашырга өйрәтү», – диде Дәүләт Советы Рәисе һәм оешманың Югары советы башлыгы.
Фото: © ТР Дәүләт Советы матбугат хезмәте
Шулай ук сәясәтче әйткәнчә, эшләгән еллар дәверендә «Татарстан – Яңа гасыр» хәрәкәте үзен республиканың барлык хакимият тармакларының һәм гражданлык җәмгыяте институтларының ышанычлы партнеры итеп күрсәтте. «ТНВ» хәрәкәте активы – кадрлар чыныктыру урыны, ә бүгенге форум форумда катнашучыларны тагын да ныграк берләштерергә, яңа дуслар табарга мөмкинлек бирә», – диде ул.
Мөхәммәтшин оешманың иң актив катнашучыларына Дәүләт Советы Рәисенең һәм Хәрәкәтнең югары советы рәисенең рәхмәт хатларын тапшырды.
Үз чиратында, оешманың башкарма комитеты рәисе Алсу Тарханова белдергәнчә, форум катнашучыларның социаль активлыгы һәм лидерлык потенциалы үсешенә ярдәм итә торган яңа идеяләр һәм проектлар табу өчен яхшы мәйданчык булган.
«Мөмкинлекләр» форумы Татарстанның Спас районы Болгар шәһәрендә 6-8 июльдә узды. Чарада катнашучыларны Россия Дәүләт Думасы һәм Татарстан Дәүләт Советы депутатлары, министрлыклар һәм ведомстволар җитәкчеләре, оешмалар директорлары, мәдәният һәм мәгариф әһелләре белән аралашу мөмкинлеге булды. Активистлар өчен лекцияләр, түгәрәк өстәлләр һәм мастер-класслар уздырылды.