Питрәч районында борынгы чиркәүләрне торгызу эшләрен башларга җыеналар
Питрәч районында борынгы чиркәүләрне торгызу буенча эшләр башкарылачак. Президент грантлары Фонды тарафыннан хупланган «Небо? – Свод!» проекты кысаларында консервация узачак дүрт чиркәү буенча пресс-тур оештырдылар. Алар Рус Сәрдәсе, Селәнгеш, Елагино һәм Югары Дәүләтъяр авылларында урнашкан. Бу хакта «Алга» сайтында Люция Сираҗиева яза.
Финанслау якынча 3 миллион сум тәшкил итә. Акча төзелеш материаллары, инструментлар һәм башка кирәк-яраклар сатып алуга тотыла. Шулай ук туган якны өйрәнү белгечләрен, архитекторларны да җәлеп итәчәкләр. Битараф булмаган җирле халыкка, шулай ук беткән авылларда туып-үскән кешеләр ярдәменә дә өметләнәләр. Чиркәүләрдә литургияләр – 100 елга якын вакыт эчендә беренче келәү итүләр булачак.
Республика чиркәүләрен торгызу белән «Куда ведут ручьи?» хәрәкәтендә катнашучылар шөгыльләнә. Волонтерлар командасында төрле яшьтәге кешеләр һәм төрле һөнәр ияләре бар.
«Без трапеза, алтарь өлешләренең түбәләрен яба алырлык материаллар өчен акча алдык. Нәкъ менә түбәләрен ябып, без бу чиркәүләрне саклап кала алачакбыз. Югыйсә 5, 10, 15 елдан соң кирпеч җимерелә һәм эш катлаулана. Шуңа күрә безнең бурыч – якын арада бердәмләшү һәм мирасыбызны саклап калу өстендә эшләү», – дип сөйләде хәрәкәт җитәкчесе Владислав Ларкин.
Архитектор-реставратор Анастасия Воронина сөйләгәнчә, объектларда, нигездә, консервация – җимерелүне туктату һәм һәйкәлнең хәзерге торышын саклау планлаштырла. Аның фикеренчә, борынгы барлык корылмаларга диярлек ныклык хас.
Медиа-кунаклар өчен объектлар буенча экскурсия үткәрделәр, алар бинаның фасадын карап чыга, эчкә керә, күргәннәрен фотога һәм видеога төшерә, кызыксындырган сорауларны бирә алды.
Проект инде гамәлгә ашырыла. Чиркәүләрдә чистарту эшләре үткәрделәр. Югары Дәүләтъярда алтарь түбәсенең каркасы монтажланган, гөмбәзләре чистартылган, вакытлы тәрәзәләр урнаштырганнар.