Татарстаннан Курск өлкәсенә гуманитар ярдәмнең чираттагы партиясе китте
Бүген Казаннан Курск өлкәсенә «Бердәм Россия» партиясенең төбәк бүлеге җыйган гуманитар ярдәм төялгән ике йөк автомобиле китте. Аны Казанда «Бәхетле» складыннан төяп җибәрделәр. Бу хакта Татарстан Дәүләт Советы матбугат хезмәте хәбәр итә.
Волонтерлар һәм гуманитар акциядә катнашучылар белән ТР Дәүләт Советы Рәисе һәм «Бердәм Россия» Бөтенроссия сәяси партиясенең Татарстан төбәк бүлеге секретаре Фәрит Мөхәммәтшин аралашты.
«35 тонна авырлыктагы ике фурага азык-төлек, шикәр комы һәм ярма, эчәргә яраклы су төялгән. Минем партия активына, гуманитар ярдәм күрсәтүдә катнашкан, авыр тормыш хәлендә калганнарга ярдәм иткән барлык татарстанлыларга зур рәхмәтемне белдерәсем килә. Ике ел дәвамында без даими рәвештә Лисичанск һәм Рубежноега ярдәм иттек, хәзер мондый ярдәмне Курск өлкәсенең зыян күргән тыныч халкына җибәрәбез», - диде Фәрит Мөхәммәтшин.
Шулай ук гуманитар конвойны озатуга «Газпром трансгаз Казан» коллективы да зур өлеш кертте, алар 7 тонна гуманитар ярдәм күрсәтте, шул исәптән азык-төлек, урын-җир һәм шәхси гигиена чаралары.
«Бердәм Россия»нең Бөгелмә җирле бүлеге гуманитар колонна формалаштыруда мөһим роль уйнады, алар бер «ГАЗель» кирәкле әйберләр җыйган. Биектау районы 10 тонна ярма, Буадан 10 тонна шикәр комы һәм ярма, ә Апас районы халкы 5 тонна ярдәм җибәрде.
Татарстан халыклары ассамблеясе 2 миллион сумлык киемнең зур партиясен сатып алган. Татарстан халыклары ассамблеясе Советы Башкарма комитеты җитәкчесе Ренат Вәлиуллин сүзләренчә, милли-мәдәни берләшмәләр гуманитар ярдәм җыюда актив катнашкан, шулай ук балалар һәм өлкәннәр өчен кием-салым тапшырган.
«Күпмилләтле Татарстан исеменнән Курск өлкәсендә яшәүчеләргә алар аеруча мохтаҗ булган әйберләрне җибәрергә телибез. Алар өчен матрас, шулай ук махсус операциядә катнашучылар өчен автомобильләр сатып алырга планлаштырабыз. Без һәрвакыт дуслык, бердәмлек турында сөйлибез, һәм бу мөһим, чөнки без - бердәм күпмилләтле гаилә, безнең көчебез шунда», - дип ассызыклады Ренат Вәлиуллин.