RAEX: БРИКС илләре югары уку йортларының үз рейтингын булдыра
Дөньяның югары уку йортларының глобаль рейтинглары БРИКС илләренең үзенчәлегенә дә, аларның үсеш максатларына да туры килми. Шуңа күрә халыкара берләшмә әгъзалары вәкилләре тарафыннан БРИКС университетлары рейтингын булдыру идеясе хупланды. Бу хакта RAEX рейтинг агентлыгы генераль директоры Дмитрий Гришанков ТАССка биргән интервьюсында хәбәр итте.
«Хәзер глобаль позицияләргә дәгъва итүче рейтингларның БРИКС илләре спецификасына, аларның тарихи үзенчәлекләренә дә, иң мөһиме, аларның үсеш максатларына да туры килмәве ачыкланды», - диде Гришанков.
Мисал итеп спикер Quacquarelli Symonds рейтингын китерде, ул югары уку йортлары студентларның халыкара карьера төзү мөмкинлекләренә карап төзелә. Әмма, Гришанков сүзләренчә, Россия яки Кытай уку йортлары үз алдына Бөекбританиягә яки АКШка эшләргә китәчәк студентларны чыгару максатын куймый.
Моннан тыш, RAEX генераль директоры сөйләгәнчә, чагыштырмача күптән түгел генә нигез салынган югары уку йортларына тарихы бай булмау сәбәпле дөнья рейтингларына эләгү бик кыен. Шуңа күрә БРИКС илләре югары уку йортлары рейтингы турында карар кабул ителде.
Элегрәк Татарстанда БРИКС төп операцион үзәген булдыру турында хәбәр ителгән иде. Аның эше Казанда саммит әзерләү һәм уздыру белән бәйле.