Санкт-Петербургта Түбән Кама Татар дәүләт драма театры гастрольләре була
29, 30 ноябрь һәм 1 декабрьдә Санкт-Петербургта Туфан Миңнуллин исемендәге Түбән Кама Татар дәүләт драма театры гастрольләре була. Бу хакта Татарстан Мәдәният министрлыгы сайтында хәбәр итәләр.
Театрның сәнгать җитәкчесе Рөстәм Галиев – ТР халык артисты, ТР атказанган сәнгать эшлеклесе, Марсель Сәлимҗанов исемендәге республика премиясе лауреаты.
Театр Санкт-Петербург шәһәренә ике спектакль һәм бер концерт программасы алып килә. Чаралар В.А.Шелгунов исемендәге мәдәният йортында була.
Театрның матур традициясе бар – аның зур гастрольләре һәрвакыт күренекле драматург Туфан Миңнуллин пьесасы буенча спектакль белән ачып җибәрелә. Драматург шәхесенә бәйле тагын бер традиция – театраль сезон ел саен 25 августта, аның туган көнендә, Туфан Миңнуллинның туган ягы Кама Тамагы районы Олы Мәрәтхуҗа авылында башланып китә, диелә хәбәрдә.
Гастрольләр программасы 29 ноябрьдә 19:00 сәгатьтә «Гөргөри кызын бирә» спектакле (режиссеры Рөстәм Галиев) белән ачып җибәрелә.
30 ноябрьдә 19:00 сәгатьтә «Сүнгән йолдызлар» спектакле (режиссеры Рөстәм Галиев) тәкъдим ителә. Спектакльләре милли театрның алтын фондына кергән Кәрим Тинчурин пьесасы буенча куелган әлеге спектакль узган ел дөньяга килде һәм тамашачылар күңелендә урын яулады, ди оештыручылар.
1 декабрьдә 18:30 сәгатьтә «Сезне сагынып килдек без» концерт программасы көтелә.