Хезмәт министрлыгы: Татарстанда һәр эшсез кеше өчен алты вакансия бар

Ноябрь ахырына булган мәгълүматлар буенча, Татарстан эш бирүчеләре «Россиядә эш» мәшгульлек һәм хезмәт мөнәсәбәтләре бердәм цифрлы платформасында 34,4 мең вакансия урнаштырган. Бу хакта ТР Хезмәт, халыкны эш белән тәэмин итү һәм социаль яклау министрлыгының матбугат хезмәтендә хәбәр иттеләр.

«Ел башыннан алып 22,4 мең кеше эш эзләүче сыйфатында мәшгульлек хезмәтенә исәпкә кабул ителгән, аларның 60 проценттан артыгы эшкә урнаштырылган. Хәзерге вакытта 5,9 мең кеше эш эзли һәм мәшгульлек хезмәтендә исәптә тора», - дип хәбәр иттеләр матбугат хезмәтендә.

Бу вакансияләрне исәпкә алсаң, һәр эшсезгә шартлы рәвештә алтыга якын вакансия туры килә дигән сүз. Татарстанда барлыгы 233 меңнән артык кеше «Россиядә эш» порталында үзенең резюмесын урнаштырган. Нигездә, бу – эше булган кешеләр, әмма алар тагын да җәлеп итүчәнрәк тәкъдимнәрне карарга әзер.