Рабит Батулла Тинчурин исемендәге премия булдырырга тәкъдим итә

Татарстанның халык язучысы Рабит Батулла Тинчурин исемендәге премия булдырырга тәкъдим итә.

«Тукай премиясе бар, Исхакый премиясе бар, Шәйхи Маннур премиясе бар. Ә ни өчен Тинчурин премиясе юк?», – дигән сорау куйды ул Тинчурин театрында Тинчуринга багышланган «Хыялга бер адым» спектакле чыгу уңаеннан уздырылган матбугат конференциясендә.

«Күпме театрыбыз бар, һәрберсенең репертуарында Тинчурин әсәрләре бар. Димәк, Тинчуринның күпме гонорары җыелган дигән сүз. Шуңа күрә бу премияне гамәлгә куярга кирәк», - диде Рабит Батулла.

Ул бу премиягә драматурглар да, артистлар да, режиссерлар да ия була алырга тиеш дип саный.

Тинчурин исемен мәңгеләштерү темасына Тинчурин театры директоры Фәнис Мөсәгыйтов та кушылды.

«Тинчурин исемен мәңгеләштерү темасында әкренләп эш бара. Ике җирдә бюсты барлыка килде. Алга таба да эш алып барылыр. Тинчурин исеме моңа лаек», – диде ул.

• Тинчурин театрының баш режиссеры Туфан Имаметдинов Кәрим Тинчуринның татар театры труппасы белән Үзбәкстанга сәяхәте турында хатирәләргә нигезләнеп «Хыялга бер адым» дигән спектакль чыгара. Пьесаны театр заказы белән Рөстәм Галиуллин язган. Пьеса Рабит Батулланың «Җимерелгән бәхет» китабы мотивлары буенча язылган.
• Премьера 19-19 декабрьдә көтелә.