Топилин: Ислам финанслары буенча экспериментны 2028 елга кадәр озайтырга тәкъдим ителде

Партнерлык (ислам) финанславы буенча экспериментны 2028 елга кадәр озайтырга мөмкиннәр. Бу хакта «Татар-информ»га Дәүләт Думасының Икътисади сәясәт комитеты рәисе, Татарстаннан депутат Максим Топилин хәбәр итте.

«Ислам банкингы буенча эксперимент үзенең нәтиҗәлелеген күрсәтте. Аерым алганда, шуңа күрә аны 2028 елның 1 сентябренә кадәр озайтырга тәкъдим ителде. Шуның белән, яңа закон проектында без берничә үзгәреш тәкъдим итәбез. Документ без экспериментны гамәлгә ашыру барышында ачыклаган үзенчәлекләрне исәпкә ала. Аерым алганда, тәҗрибәдә катнашучылар реестрына Үзәк банк күрсәтмәләрен үтәмәгән (федераль законнарны яки норматив актларны бозган) компанияләр кертелмәячәк», - дип сөйләде парламентарий.

Партнерлык финанслау юнәлеше тагын да активрак үсәчәк һәм Татарстанга Якын Көнчыгыш һәм Көнчыгыш Азия илләреннән яңа инвестицияләр җәлеп итәчәк, дип ышана Топилин.

Партнерлык банкингы буенча ике еллык эксперимент Россиянең дүрт төбәгендә 2023 елның 1 сентябрендә Татарстан, Башкортстан, Дагыстан һәм Чечняда башланды. Ислам финанславының асылы банкларның «хәләл булмаган» операцияләр үткәрүдән баш тартуында, алар процентлар түләү, табыш алуда билгесезлекләр белән килешүләр, шәригать законнарын бозулар белән бәйле бизнесны финанслау (уен бизнесы, алкоголь, тәмәке, дуңгыз ите җитештерү, процент белән кайтару нияте белән бурычка акча бирү һ.б.).