Вирусолог метапневмовирусның кемнәр өчен аеруча куркыныч булуы турында сөйләде

Бер яшькә кадәрге балаларда һәм өлкән яшьтәге кешеләрдә Кытай метапневмовирусы аеруча авыр формада узачак. Бу хакта «Парламентская газета» Россия Фәннәр академиясе академигы, И.И.Мечников исемендәге Вакциналар һәм сывороткалар фәнни-тикшеренү институтының фәнни җитәкчесе Виталий Зверевка сылтама белән хәбәр итә. РИА Новости шул хакта яза.

«Эш шунда ки, бу вирусны да, кискен респиратор вирус инфекцияләрен китереп чыгаручы башкаларны да үзенчәлекле дәвалау ысулы юк. Грипп кына искәрмә булып тора. Симптоматик дәвалаудан башка, бернәрсә дә кулланырга ярамый», - дип басма аның сүзләрен китерә.

Узган атнада Сәламәтлек саклау министрлыгының йогышлы авырулар буенча штаттан тыш баш белгече, профессор Владимир Чуланов әйтүенчә, метапневмовирус симптомнары кискен тын юллары вирус инфекциясенә (ОРВИ) охшаган. Кеше ютәлли, томау төшә, температура күтәрелә, сулыш алу авырлаша, тавыш карлыга.

Шул ук вакытта, аның сүзләренчә, өлкәннәр һәм дүрт яшькә кадәрге балалар чир аеруча авыр формада уза торган кешеләр төркемен тәшкил итә.

Метапневмовирус чире төрле илләрдә инде дистәләгән еллар тарала. Аның активлыгы ОРВИ һәм грипп белән авыручыларның сезонлы югары ноктасына туры килә. Экспертлар сүзләренчә, ул һава-тамчы юлы, кайчагында контакт-көнкүреш юлы аша йога.

Декабрьнең соңгы атнасында Кытайда метапневмовирус чире таралуы күзәтелде. Кытайның авыруларны контрольдә тоту һәм профилактикалау идарәсе мәгълүматлары буенча, вирус, грипптан кала, таралу буенча икенче урында тора, өстәвенә, ике очракта да авыручылар саны алдагы атна белән чагыштырганда арткан, бу табибларда борчу тудырган.

Моннан тыш, Казахстанда октябрь башыннан метапневмовирусның 30 очрагы ачыкланган. Роспотребнадзорда Кытайдагы эпидемиологик вазгыятьне күзәтүләрен билгеләп үттеләр.