Казанда чаңгы буенча Россия кубогының бишенче этабының беренче ярышлары тәмамланды

Бүген Татарстан Республикасының Тынычлык бистәсендә чаңгы ярышлары буенча Россия кубогының бишенче этабы башланды, дип хәбәр итте «ТИ-Спорт» журналисты вакыйга урыныннан.

Хатын-кызлар арасында ярышлар ирекле стильдә 10 километрга аерым старт белән узды. Татарстан җыелмасы вәкиле Наталья Терентьева (23:12.1) беренче урынны яулады. Вологда өлкәсеннән Алина Пеклецова (23:22.0) икенче килде. Төмән өлкәсе җыелмасыннан Екатерина Смирнова (23:23.8) бронза медальгә лаек булды.

Ир-атлар арасында ярыш ирекле стильдә 15 километрга аерым старт белән үткәрелде. Татарстан җыелмасыннан Савелий Коростелев (31:07.1) – беренче, Төмән өлкәсе чаңгычылары Артем Мальцев (31:13.1) белән Денис Спицов (31:15.3) икенче һәм өченче урынны яулады. Татарстан җыелмасының икенче вәкиле Сергей Ардашев (31:18.8) дүртенче булып килде.