Владимир Леонов: Казан Кышкы БРИКС уеннарын кабул итәргә тели
Татарстанда спортның кышкы төрләре буенча БРИКС илләре Уеннары проектын әзерлиләр. ТР спорт министры Владимир Леонов үзе җитәкли торган ведомствоның 2024 ел нәтиҗәләренә багышланган коллегия утырышында шулай дип белдерде.
«Шундый инициатива белдердек. Әлеге мәсьәләне федераль коллегаларыбыз белән бергәләп тикшерәчәкбез», - дип ышандырды ТР спорт министры.
БРИКС илләренең спорт уеннары Казанда 12-24 июньдә узды. Ярышлар 80нән артык илдән 5 меңгә якын катнашучыны җыйды, 387 комплект медаль уйнатылды. БРИКС Уеннарын социаль челтәрләрдә 1 миллиардтан артык кеше карады.
Соңрак Татарстан башкаласында БРИКС илләре Парауеннарын үткәрергә тәкъдим иттеләр. Октябрьдә әлеге инициативаны җентекләп өйрәнүләре билгеле булды.