Айдар Шәйхин: Халык мәдәниятенә караган исемнәрне шәхси милек итеп теркәүне тыярга кирәк

– Бу ситуация татар мәдәнияте, гомумән, Россия халыклары мәдәнияте өчен шактый куркыныч. Миңа калса, беренче чиратта, Россия Дәүләт Думасындагы Татарстан депутатлары игътибарлы булырга һәм закон чыгару өлкәсендә активрак эшләргә тиеш. Россия халыкларының халык авыз иҗаты, халык мәдәниятләренә караган мондый исемнәрне, атамаларны ниндидер шәхси милек буларак теркәү мөмкинлеген тыярга кирәк.

Татар җәмәгатьчелеге, төрле иҗтимагый оешмалар, дәүләт оешмалары бу мәсьәләгә җитди карарга тиеш, чөнки, иртәме-соңмы, әлегә зыян килмәгән оешмаларга җитдирәк дәгъвалар килергә мөмкин. Чынлап та, суд аша әлеге кабул ителгән карарны югарырак инстанцияләрдә карарга тиешләр, дип уйлыйм.

Миңа калса, әлегә соң түгел, әмма җәмәгатьчелекнең игътибары зур булырга тиеш. Бу канунның мантыйгына туры килми торган хәлләр безне борчый, аның кануни яктан чишелеше дә булырга тиеш, – ди ул.

Татар халык әкиятләре геройларын пантентлаштыру мәсьәләсенә карата җәмәгатьчелек фикерен «Интертат» сайты өчен Зилә Мөбәрәкшина белеште.

• «Шүрәле»не юк итәргә»: Татар халкының әкият геройларын яклаучы табылырмы?