Чаллыда 1224 урынлы яңа мәктәп төзеләчәк
Быел Чаллыда яңа мәктәп барлыкка киләчәк. Ул 1224 урынга исәпләнә һәм Мәләкәс аръягы районының 22 нче микрорайонында төзеләчәк. Бу хакта аппарат киңәшмәсендә шәһәр башкарма комитеты җитәкчесе урынбасары Мансур Фәттахов әйтте.
Шәһәр башлыгы Наил Мәһдиев искәрткәнчә, әгәр яңа мәктәпләр төзелмәсә, Чаллы балаларына өч сменада укырга туры килер иде.
«Мәктәпкә керүче балалар саны арта. Бу җитди таләп булды. Ил, республика җитәкчелеге ярдәме белән бу бурычны уңышлы чишәбез!» – диде мэр.
Соңгы ун елда Чаллыда 10 мәктәп төзелгән. Яңа белем бирү оешмасы унберенчесе була. Наил Мәһдиев яңа мәктәпне Россия Президенты Владимир Путиннан һәм Татарстан Рәисе Рөстәм Миңнехановтан Чаллының 400 еллыгына «бүләк» дип атады.
Мәктәп быел ачылыр дип планлаштырыла.