Татарстан Гидрометеоүзәге башлыгы республикада боз катламы барлыкка килү ихтималын әйтте

Аномаль җылылык һәм температураның еш үзгәреп торуы аркасында бу кышта Татарстанда хәзер кар катламының биеклеге уртача күпьеллык күрсәткечләрдән түбәнрәк. ТР Гидрометеорология һәм әйләнә-тирә мохитне күзәтү идарәсе башлыгы Феликс Гоголь бүген «Татар-информ» агентлыгына шулай дип белдерде.

«Республикада кар катламының биеклеге тигез түгел – ул 2 сантиметрдан («Кайбыч» метеостанциясе) алып көнбатышта (Бөгелмә) 40 сантиметрга кадәр тәшкил итә. Чүпрәле һәм Буада – 15 сантиметр тирәсе, ә көнчыгыш һәм төньяк төбәкләрдә – биегрәк. Хәзерге вакытта республикада кар катламының биеклеге нормада 15-35 сантиметр тәшкил итәргә тиеш», - диде ул.

Шул ук вакытта, Гоголь хәзерге вакытта берничә метеостанциядә кар катламының биеклеге уртача күпьеллык күрсәткечләрдән бераз югарырак булуын искәртте. Әйтик, Арчада (33 сантиметр).

«Республикада куркыныч метеорологик күренешләр күзәтелми, боз кабыгы юк. Әмма ул барлыкка килмәс дип әйтеп булмый», - диде Гоголь.

ТР Гидрометеорология һәм әйләнә-тирә мохитне күзәтү идарәсе мәгълүматлары буенча, республикада гыйнварның икенче декадасында туфракта туңның тирәнлеге кимегән (2-8 сантиметрга). 20 гыйнварга булган мәгълүматлардан күренгәнчә, туфракта туңның тирәнлеге – 10-35 сантиметр, Минзәләдә 5 сантиметр (норма буенча 50-80 сантиметр) тәшкил иткән.

Югары температура режимы туфрактагы температурага көзге культураларның тармаклану өлешендә 0..-2 градустан түбәнрәк төшәргә мөмкинлек бирмәгән, шул сәбәпле файдалы матдәләр күбрәк сарыф ителә һәм үсемлекләрнең кышкы салкыннарга чыдамлыгы кими.