Пенсионерларга фатир төзекләндергәндә матди ярдәм алу мөмкинлеге турында искәрттеләр
Пенсионерлар үз торакларын төзекләндергәндә билгеле бер ярдәм чараларына дәгъва итә ала. Бу хакта төзелеш эксперты – «ГЛАВСНАБ» компаниясенә нигез салучы һәм директоры Федор Васильев сөйләде дип хәбәр итә RT.
«Ярдәмнең бер варианты торакны төзекләндергәндә матди ярдәм алу булып тора. Аны алу өчен пенсионерга гариза белән социаль яклау органнарына мөрәҗәгать итәргә кирәк. Башта ремонт кирәклеге турында торак комиссиясе бәяләмәсе төзү таләп ителә», – дип аңлатты белгеч.
Бәяләмә төзү өчен комиссия вәкилләре фатирны карап чыга һәм кирәкле эшләрне билгели. Шушы документ нигезендә пенсионерга бердәм түләү бирелергә мөмкин. Аның күләме төрлечә була, әмма гадәттә, елына 15 меңнән дә артмый.
Моннан тыш, Россиянең кайбер субъектларында бушлай яки ташламалы вак-төяк төзекләндерү программалары да бар – алар җирле администрация дәрәҗәсендә яки хәйрия фондлары аркылы оештырыла.
Мондый программалар буенча электр чыбыкларын алмаштыру, ванна бүлмәсендә өстәмә тотынгычлар кую, идәнне төзекләндерү яки куркынычсыз газ плитәләре кую эшләре башкарылырга мөмкин, дип аңлатты белгеч.
«Кайбер төбәкләрдә ремонт өчен өстәмә субсидия яки компенсация дә каралган. Мәсәлән, әгәр пенсионер аз керемле кешеләр категориясенә керә яки муниципаль торакта яши икән, төзекләндерүгә тотылган чыгымнарның бер өлешен бюджеттан каплап була», – дип өстәде Федор Васильев.