Татарстан алгарышлы ИТ-карарлар программасына 5 млрд сум бүлеп бирәчәк
Татарстан «Мәгълүматлар икътисады» илкүләм проектына өстәмә рәвештә алгарышлы ИТ-карарлар республика программасын эшләтеп җибәрәчәк. Бу хакта Татарстан Республикасы Дәүләт идарәсен цифрлы нигездә үстерү, мәгълүмат технологияләре һәм элемтә министрлыгының йомгаклау коллегиясендә республика Рәисе Рөстәм Миңнеханов әйтте, дип яза «Татар-информ».
«ИТ өлкәдә алдынгы төбәк буларак, республика алдында тармакны алга таба үстерү буенча җитди бурычлар тора. Федераль чараларга өстәп, республикада тормыш сыйфатын яхшыртуга юнәлдерелгән алгарышлы ИТ-карарлар программасын тормышка ашыру өчен биш ел дәвамында берәр миллиард сум бүлеп бирү турында карар кабул итәчәкбез», – диде Рөстәм Миңнеханов.
Татарстан Республикасы дәүләт идарәсен цифрлы нигездә үстерү, мәгълүмат технологияләре һәм элемтә министры Айрат Хәйруллин әлеге программа биш база проектыннан һәм яңа 10 ИТ-проекттан тора дип өстәде.
«Бу программаны тормышка ашыру дәүләт идарәсе нәтиҗәлелеген 10 процентка күтәрергә, бюрократия гамәлләрен 15 процентка киметергә, төбәкнең тулай продуктында цифрлы икътисад өлешен 4 процентка аттырырга һәм 5 меңнән артык югары технологияле яңа эш урыны булдырырга ярдәм итәчәк», – диде Айрат Хәйруллин.