Мөслимдә мөселман яшьләре арасында спартакиада узды
26 гыйнварда Мөслим районының Мөслим авылында мөселман яшьләре арасында спартакиада үтте. Әлеге чара Россиядә игълан ителгән Ватанны саклаучылар елы һәм Диния нәзарәте тарафыннан игълан ителгән «Каһарманнар елы» кысаларында оештырылды. Бу хакта ТР Диния нәзарәте матбугат хезмәте хәбәр итә.
Спартакиадада Татарстанның 17 районыннан 19 команда катнашты. Алар төрле спорт төрләрендә: мини-футбол, кул көрәше, бадминтон, гер күтәрү, аркан тарту һәм йөзү ярышларында көч сынашты.
Катнашучылар шулай ук Пәйгамбәребез Мөхәммәд (с.г.в) тормышына багышланган викторинада катнашты, ул Исра вә Мигъраҗ кичәсе уңаеннан оештырылды. Җиңүчеләр һәм актив катнашучылар кыйммәтле бүләкләр һәм дипломнар белән бүләкләнде.
Ярыш нәтиҗәләре буенча, беренче урынны Тукай мөхтәсибәте командасы алды, икенче урында – Мөслим мөхтәсибәте, өченчедә – Актаныш мөхтәсибәте.