«Мисс Татарстан – 2025» Иделия Бәдертдинованың әнисе: Подиумга дога укып чыга, ураза тота

«Мисс Татарстан – 2025» республика бәйгесе җиңүчесе титулына ия булган 17 яшьлек Чаллы кызы Иделия Бәдертдинованың әнисе кызының матурлык бәйгесендә катнашуына карата фикерләрен әйтте. Бу хакта ул «Татар-информ» мәгълүмат агентлыгында матбугат конференциясеннән соң журналистлар белән аралашканда сөйләде.

«Иделия матурлык бәйгесендә катнашканда, әлбәттә, иң башта минем эчке конфликт булды. Үзебез гел дин кагыйдәләрен үтәп яшәргә тырышкан гаилә, мин 8 ел элек яулыктан. Кызыбыз «Мисс Чаллы» бәйгесендә катнашканда купальниктан дефиле булмады. Ә монда тоташ купальниктан подиумнан үтәсе булгач ризалаштык. Гайбәттән курыкмадык. Иделия дә динле бала булып үсә, подиумга дога укып чыга, ураза тота. «Адымнар» полилингваль гимназиясендә дә белем алгач, татар телен әйбәт белә. Өйдә татар телендә сөйләшәбез», – диде Иделия Бәдертдинованың әнисе.

Иделия Бәдертдинова үзе билгеләвенчә, ул татар телен дә яхшы белә.

Иделия һәм «Мисс Казан – 2025» Екатерина Гайнуллина

Фото: © «Татар-информ», Рамил Гали

«Татар телен яхшы беләм. Әниләр мине нык яраталар. Шуңа күрә дә бәйге вакытында да миңа якыннарым ярдәм итеп торды. Мин «Мисс Татарстан» титулына ирешүем белән горурланам. Бик бәхетлемен. Мин хыялым – гимназияне тәмамлап, Казанга, югары уку йортына – халыкара мөнәсәбәтләр факультетына укырга керәсем килә. Хореография белән шөгыльләнеп кызыл дипломга ия булдым. Әлеге вакытта Модельләр мәктәбендә белемнәремне арттырам», – диде ул.

• «Мисс Татарстан» бәйгесендә 14 яшьтән алып 23 яшькә кадәр кызлар катнашу хокукына ия

Бу хакта: «Мисс Татарстан»га күзәтү: матурлык һәм зирәклек ничек сынала?