Лаеш районында 75 яшьлек чаңгычыны коткарганнар
Пенсионер хатын Лаеш районы Шуран авылы янында чаңгыда йөрергә чыккан. Авылдан өч чакрым ераклыктагы урманда ул егыла һәм оча-бот буынын имгәтә. Вазгыять ашыгыч ярдәмнең зыян күрүчегә барып җитә алмавы белән катлаулана. Бу хакта Татарстан Республикасы Гадәттән тыш хәлләр министрлыгы матбугат хезмәтендә хәбәр иттеләр, дип яза «Кама ягы» сайты.
Урынга 3нче зона коткару отряды коткаручылары чакырылган. Прицеплы кар машинасында алар вакыйга урынына килеп җиткәннәр, беренче ярдәм күрсәткәннәр, зыян күрүчене эвакуацияләгәннәр һәм медикларга тапшырганнар.