Сыктывкарда Татарстан артистлары катнашында концерт булды
28 гыйнварда Сыктывкар шәһәрендә Татарстан Республикасы артистлары катнашында концерт булды. Концерт Бөтендөнья татар конгрессы Башкарма комитеты җитәкчесе, Татарстан Республикасы Дәүләт Советы депутаты Данис Шакировның сәламләү сүзе белән башлап җибәрелде. Бу хакта Бөтендөнья татар конгрессы хәбәр итә.
Данис Шакиров татар халкының рухи үсешенә, милли мәдәниятләрне үзара баетуга һәм халыклар арасындагы элемтәләрне ныгытуга керткән зур өлеше өчен активистларны Бөтендөнья татар конгрессының Рәхмәт хатлары белән бүләкләде.
Чара кысаларында татар мәдәниятенең байлыгын чагылдырган төрле музыкаль номерлар тәкъдим ителде. Концерт музыка бәйрәме генә түгел, ә Татарстан белән Коми арасындагы дуслык һәм хезмәттәшлек символы булды. Чарада катнашучылар бердәмлек һәм мәдәни традицияләргә карата үзара хөрмәт рухы белән сугарылган уникаль атмосфера белән ләззәтләнә алды, диелә хәбәрдә.