Думада мәктәпләрнең дини кием киюне тыю хокукы турындагы закон проектын кире алдылар
Дәүләт Думасы вице-спикеры Владислав Даванков («Яңа кешеләр») мәктәпләргә дини кием киюне тыю хокукын бирә торган закон проектын кире алды.
«Россия Федерациясенең аерым закон чыгару актларына үзгәрешләр кертү турында» федераль закон проектын (җәмәгать урыннары һәм белем бирү оешмаларында дини кием киюне чикләү өлешендә) кире алуны сорыйм», - дип язылган документта.
Аңа кадәр Даванков, әлеге закон проектын тәкъдим итеп, дини кием киюне террор куркынычы югары булуга бәйле рәвештә чикләргә кирәклеге белән аңлатты. Йөзе ябык булган кешене камера аша танып булмый, дип искәртте ул. Мәктәпләрдә мондый киемне тыю белем бирүнең дөньяви характерын беркетергә ярдәм итәчәк.
Ул шулай ук ата-аналар советы әгъзаларының 50 проценттан артыгы «риза» дип тавыш бирсә, мәктәптә никаб киюне тыеп булачагын искәртте.