Песков: Трамп һәм Путин әлегә бер-берсе белән сөйләшмәде

Россия һәм Америка Кушма Штатлары Президентлары Владимир Путин һәм Дональд Трамп әлегә бер-берсе белән сөйләшмәде. Кремльнең рәсми вәкиле Дмитрий Песков, Америка лидерының Россия коллегасы белән Вашингтонда булган авиаһәлакәт хакында фикер алышмавы турындагы сүзләрен шәрехләп, шулай дип белдерде. Бу хакта ТАСС агентлыгы хәбәр итә.

«Булмады», - дип белдерде Песков, ике лидер арасында сөйләшү булдымы дигән сорауга җавап биреп.

Элегрәк журналистлар Трамптан, фаҗигадә үлүчеләр арасында россиялеләр дә булганга, Вашингтон янындагы авиаһәлакәт хакында РФ Президенты белән сөйләштегезме дип сораган иде. «Юк. Бу тема буенча мин Путин белән элемтәгә чыкмадым», - дип җавап бирде АКШ Президенты. Бу сүзләрдә күпләр башка темаларга сөйләшү инде булуына ишарә күргән.

30 гыйнварга каршы төндә Вашингтон янында Рональд Рейган аэропортына төшәргә җыенганда American Airlines авиакомпаниясенең Bombardier CRJ700 самолеты Sikorsky H-60 Black Hawk хәрби вертолеты белән бәрелешкән, шуннан соң һава судноларының икесе дә Потомак елгасына төшкән.

Авиалайнерда – 60 пассажир һәм дүрт экипаж әгъзасы, ә вертолетта өч хәрби булган. Самолетта фигуралы шуучылар һәм тренерлар, шул исәптән Россия җыелмасы составында 1994 елгы дөнья чемпионнары Евгения Шишкова һәм Вадим Наумовның АКШ чемпионатыннан кайтып килеше булган. Беркем дә исән калмаган.