Икътисадчы өстәмә индексациядән соң пенсиянең ничек артачагы турында сөйләде

Индексациядән соң Россиядә уртача пенсия күләме 2024 ел нәтиҗәләре буенча фактик инфляция дәрәҗәсенә карата 2,1 мең сумга артачак. Россия халык хуҗалыгы һәм дәүләт хезмәте академиясенең Социаль анализ һәм фаразлау институты өлкән фәнни хезмәткәре Виктор Ляшок шулай дип белдерде. Бу хакта РИА Новости агентлыгы хәбәр итә.

«Иминият пенсияләре 2025 ел башыннан элек фаразланганча 7,3 процентка түгел, ә 9,5 процентка индексацияләнәчәк. Нәтиҗәдә, иминият пенсияләренең уртача күләме 24 059 сум түгел, ә 24 550 сум тирәсе тәшкил итәчәк», - дип искәртте эксперт.

2024 ел ахырында уртача иминият пенсиясе 22,4 мең сумга тигез булганга, үсеш 2,1 мең сумга якын тәшкил итәчәк, дип ачыклык кертте икътисадчы. Ул искә төшергәнчә, гыйнварда пенсия тулысынча индексацияләнмәвен исәпкә алып, пенсионерлар февральдә өстәмә түләү алачак.

Росстат мәгълүматларыннан күренгәнчә, 2024 елда фактик инфляция 9,52 процентка тигез булган. Россия Президенты Владимир Путин күрсәтмәсе буенча, 1 февральдән 40тан артык социаль түләү һәм пособие индексацияләнәчәк. РФ Премьер-министры Михаил Мишустин ил Хөкүмәтенең шул хактагы карарын имзалады.