Татарстан Яшьләр эшләре министрлыгы каршында «Ата-аналар институты» эшли башлый
Татарстан Яшьләр эшләре министрлыгы каршында «Ата-аналар институты» эшли башлаячак, анда экспертлар яшь гаиләләргә тәрбиянең төп мәсьәләләре буенча консультацияләр бирәчәк. Бу хакта ведомство коллегиясенең йомгаклау утырышында аның җитәкчесе Ринат Садыйков хәбәр итте. Инициативаның бурычлары «Гаилә» илкүләм проекты максатларына туры килә.
«Һәр ел үз мирасын калдырырга тиеш. Гаилә елында күпсанлы ведомствоара проектларны гамәлгә ашыру тәҗрибәсе безне министрлык каршында «Ата-аналар институты»н төзергә этәрде. Ул мөмкин кадәр күбрәк ата-аналарны һәм ата-ана булырга ниятләгән яшь гаиләләрне җәлеп итәргә, аларга кирәкле күнекмәләргә һәм компетенцияләргә өйрәнергә ярдәм итәчәк. Алар белән төрле өлкәләрдән экспертлар эшләячәк», — дип белдерде ул.
Беренче тыңлаучылар студент гаиләләре булачак, алар хәзер Татарстанда 3 меңнән артык, шул исәптән 333 гаилә, аларда ир белән хатын икесе дә студентлар.
«Ата-аналар институты» составында өч факультет эшләячәк: «Әни+әти», «Яшүсмер» һәм «Сәламәт бала», дип өстәде министр.
«Татар-информ» хәбәр иткәнчә, Татарстан Рәисе Рөстәм Миңнеханов Татарстанда демография проблемасын хәл итү буенча программа кабул итәргә кушкан иде.