Уфада «Әр-Рәхим» мәчетенең манаралары бизәлеше төгәлләнде
31 гыйнварда Уфада Башкортстан башлыгы Радий Хәбиров «Әр-Рәхим» мәчетенең төзелеш мәйданчыгында булды, анда дүрт манараның да бизәлешен төгәлләнде. Төбәк җитәкчесе гыйбадәтханә комплексын карады, монтаж һәм бизәкләү эшләрен дәвам итү буенча эшлекле киңәшмә уздырды. Бу хакта «Кызыл таң» хәбәр итә.
Искәртик, мәчет 2006 елда төзелә башлады. Төзелешне төрле инвесторлар финанслаган. 2016 елның җәендә эшләр туктатыла. 2023 елның сентябрендә Башкортстан башлыгы «Әр-Рәхим» Җәмигъ мәчете төзелешен дәвам итү мәсьәләләре буенча эшлекле киңәшмә уздырды. Шуннан соң белгечләр объектны комплекслы тикшерү уздыра һәм аның торышын бәяли. 2024 елның апрелендә төбәк җитәкчесе мәчет төзелешен яңадан башлау турында хәбәр итә.
Төзелеш мәйданчыгында булганда, Башкортстан башлыгы тышкы һәм эчке эшләр барышы белән танышты. Уфа Инвестиция-төзелеш комитетының генеральный директоры Марат Вәсимов объектны төзүне билгеләнгән график нигезендә алып барулары турында сөйләде. Якын планнарда - түбә һәм фасад эшләренә керешү, аларның мәйданы - 6 мең квадрат. Киләчәктә мәчеткә шулай ук архитектура яктырткычы куелачак.
Башкортстан мөселманнары Диния нәзарәте рәисе Айнур Биргалин республика җитәкчелегенә объект төзелешенә ярдәм иткән өчен рәхмәт белдерде. Ул билгеләп үткәнчә, «Әр-Рәхим» мәчетендә эшләр төгәлләнү алдында тора. Тиздән республика башкаласында яшәүчеләр һәм кунаклар гыйбадәтханәнең матурлыгына соклана алачак. Мәчетнең эчке бүлмәләрен үтә якты итеп ясарга ниятлиләр.
Моннан тыш, төбәк җитәкчесе подрядчы оешмалар вәкилләре белән янәшәдәге территорияне төзекләндерү, инженерлык, транспорт һәм социаль инфраструктура төзелеше мәсьәләләре буенча фикер алышты.
Журналистлар белән әңгәмә вакытында Башкортстан Башлыгы төзелә торган гыйбадәтханә комплексының уникальлеген ассызыклады, шуңа бәйле рәвештә төзелеш-монтаж эшләренең һәр этабына игътибар итәргә кирәк.
«Әр-Рәхим» - республикада озак вакыт төзелә торган иң катлаулы объектларның берсе. Шуңа күрә без аны тикшерүгә күп вакыт сарыф иттек. Хәзер беренче этапны - манаралар ясау эшләрен төгәлләдек. Аның буенча эш күләме бик зур иде. Быел фасад тышына керешергә планлаштырабыз - бу да зур эш. Ә киләсе елда эчке эшләрне башлап җибәрергә кирәк», - диде Радий Хәбиров.