Автоэксперт: Кредитлар һәркем алырлык булмау сәбәпле, тотылган машиналарга бәяләр артачак
Россия автобазары бер ел яки аннан да озаграк басым астында булачак. «Опора России» Бөтенроссия иҗтимагый оешмасының Мәскәү бүлеге финанс базарлары буенча комиссия җитәкчесе, ДИАЛОТ инвестицион компаниясенең генераль директоры Егор Диашов вазгыять турында сөйләде. «Ридус» басмасы шул хакта яза.
Эксперт 2025 елга автокредит сегменты 20-30 процентка кимүне фаразлаучы күп кенә белгечләр фикеренә таянган. Ихтыяҗ югары процент ставкалары, утильләштерү җыемы арту нәтиҗәсендә автомобильләргә бәяләр үсеше һәм башка сәбәпләр аркасында кимиячәк.
«Дилерлар базарның яңа һәм тотылган автомобильләр белән тулуы белән очрашырга мөмкин, бу бәяләрнең һәм маржинальлекнең төшүенә китерәчәк. Кайбер автосалоннар катлаулы хәлдә калырга мөмкин, бигрәк тә кредитларга нык бәйле булганнары турында сүз бара», — дип фаразлады басманың әңгәмәдәше.
Шул ук вакытта ул базарның машиналар белән артык тулы булуы башланган дип фаразлады. РБК мәгълүматлары буенча, 2025 ел башына Россия дистрибьюторлары складларында 700 мең авто җыелган. 2024 елда 400 мең булган.
«Күп кенә потенциаль сатып алучылар яңа автомобиль сатып алуны кичектерергә яки икенчел базарда уңайлырак вариантлар эзләргә мәҗбүр була, бу үз чиратында, тотылган автомобильләр бәясенә йогынты ясаячак», - дип кисәтте базардагы вазгыятьнең клиентлар өчен нәтиҗәләре турында Диашов.
Эксперт кызыксыну артырга мөмкин лизинг коткару чарасы булмаячагына игътибар итте һәм «икътисади сәясәтнең сизелерлек үзгәрешеннән башка вазгыятьнең тиз яхшыруын көтәргә кирәкми» дигән нәтиҗәгә килде.